ARLT

The Association for Latin Teaching

respice prospice

Aeneid 12: 704 - 724

Iam uero et Rutuli certatim et Troes et omnes

conuertere oculos Itali, quique alta tenebant               705

moenia quique imos pulsabant ariete muros,

armaque deposuere umeris. stupet ipse Latinus

ingentis, genitos diuersis partibus orbis,

inter se coiisse uiros et cernere ferro.

atque illi, ut uacuo patuerunt aequore campi,              710

procursu rapido coniectis eminus hastis

inuadunt Martem clipeis atque aere sonoro.

dat gemitum tellus; tum crebros ensibus ictus

congeminant, fors et uirtus miscetur in unum.

ac uelut ingenti Sila summoue Taburno                     715

cum duo conuersis inimica in proelia tauri

frontibus incurrunt, pauidi cessere magistri,

stat pecus omne metu mutum, mussantque iuuencae

quis nemori imperitet, quem tota armenta sequantur;

illi inter sese multa ui uulnera miscent                      720

cornuaque obnixi infigunt et sanguine largo

colla armosque lauant, gemitu nemus omne remugit:

non aliter Tros Aeneas et Daunius heros

concurrunt clipeis, ingens fragor aethera complet.


ARLT Latin Reading Competition

 2014 - results

 RESULTS

2010

2011

2012

2013

2014

2015

2016

2017